MINAHASAN BLUES
(I)
Bus ka
Menghembus laju malintas
Tiap tikungan
Qta deng dia
Masih aja bersetia
Dalam kedirian masing-masing
Dari balakang
Kondek datang tagi doi
3000 pera for dopulu kilo lebe dari Tomohon
Eh, baru tre lewat partigaan Pineleng
Tong pe oto Dong kase brenti
Pemur lei ! tenga hari tua bagini ada suepeng
Nyanda puas Dong deng gaji bulanan
Salalu jo bapajak pa sopir-sopir
Baru tadi pagi lei di pinus Lahendong
Dong pajak sopir-sopir Sonder-Tomohon
So nda butul komang ini pamerenta
Pulisipulisi caparuni Dong masih pake lai
Mo ator lalu lintas kata
Pii…
Mo bapancuri gaji sa’nu !
MINAHASAN BLUES
(II)
Bajalang
Di pusat kota Tomohon
Cari oto
Ka bekas terminal Sonder
Di prampatan Paslaten
Qta bobou sate ba
Samantara bakar sapanjang rei Sion –
Kios buku GMIM
Yang skarang so lebe maraya
Di tenga serbuan VCD bajakan utiuti
Deng kepungan rental play station
Di amper samua lorong
Pas sampe ruma
Qta dengar Sion FM
Papa da stel
Cukimai,
Orang-orang gunung lidah baminya-minya
Bicara Lu-Gue di Ajang Curhat
So bukang gampang komang
Tong pe kayomba’an ini
Apa jo nanti torang pe dotu-dotu mo bilang
Kalu de pe turunan skarang
Mo pake Tong deng Dong saja
Minder stenga mati
Ini nimbole kase biar, tamang
Mo taru di mana tong pe muka ?
Wahai, anak-anak puyun ni Lumimuut-Toar !
MINAHASAN BLUES
(III)
Ujang karas
Sapanjang jalang ka Sonder
Beking Tomohon di balakang tatinggal
Dalam kabutan
Sabla pa qta
Parampuang pasung dari Sarongsong
Resah dititik tetesan
Aer ujang yang manyusup retakan
Bagean atas pinggiran pintu mikrolet
Dari tape oto
Qta dengar Pussy Cat
Mangalun dalang lagu
Yang qta sandiri so nda tau apa judulnya
Maso Kolongan Atas
Kage sopir kase mati tu tape
“iko akang dang di lorong tenga”
Cukurungan,
Qta make dalang hati
“Itu lagu blum riki klar”
Tape sopir so nyanda pasang ulang
“Beking tagantong jo !”