C I N G K E
Cingke nae harga
Lonte tatawa cina
Cingke lagi panen
Tole mabo sadap
Cingke dua karong
Keke bli kalong
Cingke taambor-ambor
Nyong cuci tangan deng Bir
Cingke tafiaro-fiaro
Broer pe kolestrol nae
Cingke abis . . .
Tole deng Keke bahaga
Koperasi bahura !!
mar’07
GARGANTANG GUNUNG
Samua sadap
Sampe bulu dorang makang
Tikus
Anjing
Paniki
Ular
Babi, mo tanya leh ?!
Dorang Sikat !
Memang katu
Kalo so di blanga
So ikyang ityu !!
Biar cuma se pidis
Se ilang anyer
Asal ada seho !
mar’07
D A R A
Malaikat turun ke Bumi
Segerombolan datang ke Tomohon
Sekompi ke Tondano
Sebatalyon ke Manado
Tugas istimewa menanti
Melindungi karya surga !!
Kecantikan
Kemolekan
Kepolosan
Dara Minahasa
Kini . . . Malaikat Letih
Sang Dara melarikan diri
Tanah Lumimuut ditinggal
Sorong jadi saksi
Karya Surga dikomersilkan
mar’07
M A N G U N I T R I P
Smokol ubi di kinilow
Makang siang di Tinoor
Malam dapa makang gratis
Ada orang kaweng di Sonder
Amper pagi mabo di Leilem
Lusa
So di I C U Bethesda !
mar’07